Gisteraovend, mit de tradiesjoneele Senaatsvergadering op Prinsjesdag, is tot zien èège groote verrassing Toon von der Haar (“Toon de Kroon”), vanwèège zien buutegewoone verdienste vör de Génnepse Vastlaovend, benoemd tot Officier van ’t Bombakkes.
Vanwèège en geplénde rinnevaasie kôs de Senaatsvergadering dit jaor nie pléts viende ien ’t a.lde Stadhuus. Daoröm waare we uutgeweeke naor o.ns Rizzidensie Hotel de Kroon.
En da kwam èègelek wél mój uut: Toon is daor al meer as 3 x 11 jaor gastheer. Saame mit Marian en hun personeel zörgt ie d’r vör dat wïj daor nooit wat te kort kómme. Wïj zien daor kie.nd ân huus, d’r kan hôs alles en we hoeve ’t mar te vraoge of ’t wördt geregeld.
Ien 1994 wier Toon gevraogd öm en jaor as Prins Toon I dör ’t lèève te gaon: Wat was ’t vör hum en Marian mój öm ien hunne èège zaol dit prachtige feest mit te mugge maake. Ien de jaore daornao sloot Toon zich ân bïj de Raod van Elf. Daorvan nam hïj nao 11 jaor ien 2005 afscheid, mar daornao is ie zich mit hart en ziel vör de Vastelaovend ien blieve zétte. Vöral op muzikaol gebied hét ie daorbïj veul betèèkend. Bïj de joekskapel van de ex-Hoogheden “Bombarie” is ie “Kapelmeister” en spult ie al meer as 22 jaor de “schuuf”. Da’s èvvel nie genoeg, want ôk bïj “Zuutjes Èn” blaost Toon enne nie onbescheide toon mit. Mar nie alleen op de trombone kan Toon vöruut; ôk de trékbuul, piano en doedelzak kénne wénnig geheime vör ‘m.
Ôk schrieft ie jaorleks mit ân ’t liedje van de Ex-Hoogeden en is Toon ieder jaor betrokken bïj ’t saamestélle van de Openingsmis op d’n 11e van d’n 11e. Hïj verzörgt dan ’t misbuukske en zörgt d’r vör dat de gezaameleke joekskapélle daor goe.d vör d’n dag kómme.
Al mit al reeje genoeg dus öm Toon te benoeme tot Officier van ’t Bombakkes. De bïjbeheurende oorkonde kreeg hïj uut ha.nde van Prins Stef uutgereikt. De offisjeele versiersele zulle ‘m ovverhandigd worre op d’n 11e van d’n 11e, as wïj wér allemaol ien vol ornaot, mit steeke op, verzaameld zulle zien ien o.ns rizzidensie Hotel de Kroon. Da kö.mt mój uut, want dan kan ie d’r dan mój nóg enne wéggèève.