Op maondag 8 April bereikte ó.ns ´t droevig bericht dat ‘n echte vastelaovendsman en bekende Génnepenaar. Paul Wessels is iengeslaope.
Hïj haj nie allènnig ’n groot hart vör de politiek maar zeer zeker ôk vör de Génnepse vastelaovend. Jaore lang was hïj lid en vörzitter van de jury vör de karnavalsoptocht en veule maole ien de slagerbalsjury waor fantastiesche Génnepse liedjes uutgebrocht zie.n.
Paul was ôk de grote spil tussen de vastelaovendklups ien de gemi.nte op ’t gemi.ntehuus, menig keer lobbyde hïj vör ’t belang van de vastelaovend. D’r was gén receptie van ’n prins van de jeugdColaradokévers, ’t Bombakkes, en de Waggelaars, of jubileum van ’n klup die hïj aover sloeg. Bïj menig zittingen wier ie a.ltied wel iefkes politiek op de hak genoome mar nam dat a.ltied breed lachend en sportief op.
Als wethouder zurgde ie ‘n keer karnavalsdinsdag al um 06.00 uur de hele mé.rge de route vör de jeugdboerebrulof schön geschove wier van snèj zôdat de pèèrdekoetsen toch kosse komme. Ôk haj ie ´n belangrieke rol ien de sleuteluutreiking en ontvangst um dat allemôl wa meer smoel en cachet te gééve.
Paul stòònd vör.én als ’t um de jeugd ging. ’t Méeste werk van hum was nie zichtbaar maar deed ’n enorme bijdraage ien Limburg vör ‘t behoud van onze vastelaovends cultuur.
Hïj organisierde vör de Senaat ôk ’t jaorluks uutstapje naor den Haag waor we ’n prachtige rondleiding kregen ien en dör ’t binnehof mit o.a. de örste kamer. Paul was nie vör niks al jaore trug benoemd tot ridder van ’t Bombakkes en sloeg gén vergadering of activiteit aover van de Senaat. ‘t beeld van Paul op de fiets mit zien fiets-tasse dör Génnep zal ò.ns nog lang bïjblie.ve en we zulle hum als zeer gewaardeerd lid enorm gaon misse. Wïj wi.nse de familie heel veul sterkte.
Paul ’n lètste groet, rust zacht.
Namens:
Vastelaovend klup ’t Bombakkes.
De Ex-Hoogheden klup ’70.
De Senaat van ’t Bombakkes.