Hédde tied aover? Gén vastelaovesbals of -resépsies waor ge hin ku.nt? Dan hébbe we nog un mój tiedverdrie.f vör ów:
Ien de afgeloope wèèke hébbe we meer dan 25.000 a.lde vastelaovesfoto’s ien de foto-albums op dees site gezét. Van alle Prinsejaore van Prins Teun d’n Örste (1947) wies Prins Ivo d’n Örste (2020) staon nów online. Veul a.lde bekénde en onbekénde Génnepse mi.nse kómme vörbïj.
De foto’s zien afkomstig uut de naolaotenschap van Ex-Prins Karel 1 (Goërtz). Ien de létste jaore van zien lèève hét hïj heel veul foto’s uut de rieke Bombakkes historie verzameld, iengescand, gerubriceerd , gesorteerd en veilig bewaord. Daorvör zien wïj hum postuum nog duuzendmaol da.nk verschuldigd. De mèèste van de foto’s kreeg Karel ângeleverd uut de privé verzaamelinge van alle Ex-Hoogheden en hun femielies. Nao ’t hingaon van Karel, hébbe wïj mit veul da.nk èn zien femilie de verzameling aover mugge neeme.
En ömdat wïj ’t ien dizze tied nów èèges ôk wat minder druk hân, hebbe we de gelegenheid gepakt, öm dit unieke materiaal nów vör iedereen toegankelek te maake. Dus, hédde efkes niks te doe.n, nim dan ’s enne digitale duik ien ’t verleeje van ’t Bombakkes. Veul plezier!
