Lie.f mi.nse.
Wat hébbe wïj en prachtig mój jaor mitgemakt! 2009 (en nog en bietje van 2010) is en jaor dat a.ltied mit en go.lde ré.ndje ien o.ns herinnering zal blie.ve. Èe.gelek begos ’t al ien november 2008, toen de keuzecommissie o.ns op enne môndagaovend belde. Wïj wisse hôs meteen dat wïj “Jao” zówwe zegge op de vraog die ze o.ns stelde. ’t Is evvel ôk en hele eer as ge gevraogd wurdt en as ge zun vastelaovendgékke ziet as wïj, dan motte d’r toch wel hele zwaore argumente zien öm “Nee” te zegge. Die ware d’r nie, mit as gevolg dat wïj nao enne hele lange, mar mojje énloop op 24 jannewaori 2009 same naor ’t Prinsebal toe lie.pe.
Wïj ware wel wat gespanne, mar op een of andere manier toch ok heel ru.stig, zo van “loat ’t mar komme” of bè. ter nog: “Laot gaon, laot gaon!”. Toen wïj eenmaol op de bühn as Prinsepaor sto.nde te straole, was d’r al helemaol gen sprake mér van spanning. Wïj wiere ze entoezjast ontvange, da was ien één woord magnifiek! Heel erg veul da.nk daorvör, want da mikt de rest van ’t seizoen wel ze mekkelek. De A.lde Garde ging helemaol uut zien dak en de Roze Vogols van Flamingo’s kwame drek mit zun man of dertig, mit ennen hoop roze vlagge o.ns fillisitere. D’n hele vastenaovend ware dees klups d’r bïj, wïj hebbe heel erg van ze genote en zien ze doar heel dankbaar vör.
’t Vastelaovendseizoen vanaf ’t prinsebal wies aswoensdag duurt mar en goei vier wèè.k, mar as ge ziet wat wïj ien den tied mitgemâkt hebbe: dat mikt en normaal mi.ns nog nie ien vier jaor mit! En ’t was allemôl èè.ve mój! Nao ’t Prinsebal was ’t Ope Huus. Wïj hebbe nooit gewete dat d’r zunne hoop mi.nse ien zun klèè.n huu.ske passe! ’t Was een prachtig feest, dat nog extra glans kreeg toen wïj heurde dat Nina Franken Kleuterprinses was geworre. Twee Hoogheden van de A.lde Garde!
Nao ’t Ope Huus begôs ’t grote geregel. D’r mos en drääjboek en programma gemakt worre, d’r mosse medaljes besteld worre en d’r mos en nïj rokkostuum gepa.st worre. Gelukkig hadde wïj daorbïj de ondersteuning van o.ns tiem van Adjudante en Schorrie: De Vlugge en zien Maike, ’t Drödje en zien Séverine en de Flitser mit zien kèè.ltje. Da tiem hebbe wïj toen TATTOO genoemd. Te Allen Tijde Telkens Oproepbare Ondersteuning heb ik daor op ’t Boerebal van gemâkt, want wïj hoefde mar te belle, of ze stonde vör o.ns klaor. Ge vuult ów èè.ge dan ôk e.cht Prins en Prinses as ge zo ien de watte wurdt gelet. Trówwes, ôk de rest van de Raod van Ellef en ’t bestuur van Bombakkes wete wat ’t is öm en Prinsepaor ’t naor de zin te make. Zo ware ze allemôl niks te beroerd öm o.ns naor ’t Ven te rije toen daor bleek dat ‘r uut ’t vollietiem van Maarten nóg enne Prins was gebaore: Rik d’n Urste.
En a.nder högtepu.nt uut da korte seizoen was natuurlek o.ns resepsie. Wat wïj daor en fillisitasies, vördrachte en kadoos ontvange hebbe, da was hôs teveul eer vör o.ns, daor worde verlèè.ge van. Vöral toen o.ns klèè.n prinseskes, Renée en Fenna, same mit hun nichtjes Roos, Liesje en Doortje enne e.chte gardeda.ns vör o.ns uutvoerden, krege wïj ’t te kwój. Wïj wisse d’r helemaol niks van en wiere totao.l verrast. Tante Lieneke had ’t helemaol mit ze vörberejd en Tante Annette en Oma Jannie hadde ôk nog ’s allemaol nïje pékskes gemâkt. Wat en verrassing!
De Vastelaovend èèges begos vör o.ns al op de woensdagaovend daorvör. Wïj hadde team TATTOO en Vorst Theo bïj o.ns uutgenodigd öm het hele programma nog enne keer dör te neme en d’r alvast enne te vatte op de goeie afloop. De fles koenjak die wïj van Arno Marinussen op ‘t Prinsebal gekrege hân, ging d’r hôs hillemaol dör (en Thei lust gao.r genne koenjak).
Donderdags zien wïj ien Nimwège, Boxmèèr en Génnep op ziekebezuuk gewèst. Da was enne zwaore, mar ôk hele mójje dag. De mi.nse ware zonder uutzondering dankbaar en vereerd toen wïj op bezuu.k kwame en da géft veul voldoening. D’n dag wier afgeslote mit ’t A.lde Wievebal waor wïj ennen hele hoop lélleke a.lde wieve mochte ontmaskere, die daornao allemôl vul knapper bleke te zien.
Daags daornao stond ’t schôllebezuuk op ’t programma. As ge ziet hoe entoezjast alle kiender reagere op de komst van de Génnepse Prinse en Prinsesse (de Colloradokèvers ware d’r natuurlek ôk bïj) dat wette dat ’t wel goe.d zit, mit de toekomst van de Génnepse Vastelaovend. ’s Aoves ware wïj dör ’t Gemèèntebestuur, mit de a.ndere Vastelaovendklups uut de gemeente uutgenodigd vör de Sleutelaoverdracht. Op ’t stadhuus (of mot ik zégge : Restaurant ’t Gerecht) wier ’t één Groot Genneps feest, vöral toen alle Prinse de sleutel van de Stad ien ha.nde hadde en klaor ware mit ’t véjf-gange diner…
Zaoterdags was ôk wer zun högtepu.nt van de Gennepse carnaval: de Mé.rtzitting. Mi.nse wat en mi.nse! Wat en prachtig verklééjd en entoezjast publiek! As ge dan de eer het, öm ennen tied op da podium te staon, dan is ’t e.cht geniete. Daor kriede toch en innerzjie van! Ge kiekt dan ôvver al da bewèègende kleurrijke vollek hin, da liekt wel en bloembolleve.ld ien de wie. nd, mit hier en daor en kaole plek of ennen uutgeblööjde…. Ik zei toen da’k d’r veul vör aover zów hebbe öm daor ooit nog ’s te mögge staon… Ekstra mój dit jaor was de bïjdrage van de Groot Gennepse Joekskapel o.l.v. Harm Vullings. Wat mie.ke die d’r en feestje van, die kosse de èèges ôk hôs gen genoeg van krie. ge.
Wïj hadde nie veul tied öm bïj te komme, want op Zondag was d’n optocht. Daor hebbe wïj allebei altied al kiends af en en mitgedaon mar as ge baove op d’n taon van de prinsewag stôt, dan belèèfde ’t toch wèr heel a.nders. Wat enne prachtigen optocht hebbe wïj mögge enschouwe. Al da we.rk dat al die groepe ien hun krejasies gestoke hân, alle moeite die iedereen d’r ienstopt: wïj wete wat ’t is, mar as ge ’t zo van baovenaf mögt bekieke, dan mikt ’t allemôl nog meer iendruk. Vlak vör o.ns mocht o.ns èège vriendestel, de A.lde Garde, ienvoege as “vremde vogels” in hun go.lde kój. Wïj hân d’r vördat wïj Prins en Prinses wiere nog en mitgewerkt en ware zeer verrast aovver ’t eindresultaat. De zjurie was ’t mit o.ns èè.ns want tot grote vreugde van de A.lde Garde én van O.ns, mochte wïj d’n hoofdpries en o.ns èège klup uutreike! (Gén dörgestaoke kaort!) Wat en eer en wat en feest! Wïj mögge hier ôk de Roze Vogols nie vergète te noeme, want die din (dör o.ns) vör d’n urste keer en d’n optocht mit en kwame prachtig mój vör d’n dag. Nao d’n optocht zien allebei die groepe ôk mit ’t Bombakkes aovergetrokke langs de cafées, waor wïj nog veul schik mit mekaor gemâkt hebbe.
D’n môndag en dinsdag stonde vör en groot deel ien ’t tèèken van de blaage. ’t Kruumelbal op s’môndags en de kienderoptocht mit énsluutend tropibal ware wer goed bezet, veul kiender die daor heel veul schik mie.ke én heel veul e.lders die daor mit o.ns van stonde te geniete. Gén boerebrulloft mér ‘dus, da vo.nde wïj èègelek wel en bietje jommer, mar de boerekoffietôffel op dinsdagmèè.n miek da en heel èè.nd goe.d.
En toen was ’t ienèèns dinsdagaovend. Nog en par keer bïj de Kroon op de grote tôffel, same mit Prins John van de Waggelaars, en Jeugdprinses Janiek en Kleuterprinses Nina. Nog ene keer fli.nk knalle! En dan komt ’t onverbiddeleke eind, op ’t bordes vör ’t stadhuus. Da’s toch wel efkes slikke. Mar ’t is tegeliek ôk heel mój öm zo, mit zien alle same, de vastelaovend mój af te sluute. Op Aswoensdag hébbe wïj d’r é.cht enne punt achter gezet, mit en mis ien de Bombasiliek en en herringbuffet bïj de Kroon.
As ge di.nkt, dat ’t dan wies d’n 11e van d’n 11e ru.stig blieft, dan hedde’t mis. Ien die 8 mônd zien d’r stiekem nog heel wat aktiviteite waor ge as prinsepaor ôk bïj heurt te zien (en da wówwe wïj ok). Toch kiekte op en gegè.ve moment alwér uut naor ’t moment dat ge de steek wer op mögt zette. D’n 11e van d’n 11e begos vör o.ns mit en busreisje naor Mestreech, öm daor de opening van de Limburgse vastelaovend mit te make. Dan stôdde daor öm 11 uur s’mèè. ns tusse 30.000 a.ndere gekke al én de foe.zel. Mar ’s Aoves was ‘t, nao en Hellige Mis natuurlek, dan zewiet: de stééke kosse wér op. Eén van de örste prinseleke handelinge was ’t installere van de urste ellef Compaene, de nïje leeje van ’t Bombakkes. ’t Feit dan Bombakkes nów en klup is mit hôs 400 Compaene, da géft toch nog wel en bizonder cachêt en o.ns prinsejaor.
Ien November en Dizzember staon d’r dan nog enne hoop mójje aktiviteite op ’t programma. ’t Schlagerbal was wer en heel gezellig, é.cht Genneps feesje, waor de Ex-Hoogheden wonne mit “Ik maak mien èège nie mer druk” mit d’n hoofdpries ginge lope. Da betèèkent dat ex-Prins Maarten straks op de mè.rtzitting toch nog enne keer op ’t podium mög staon! Wïj zien ôk nog mit heel ’t Bombakkes ien Hoensbroek gewèst, bïj de uutréjking van de Go.lde Narrekap. Daor ware heel veul Limburgse vastelaovendklups énwezig en ’t is mój öm te zie.n hoe iedereen ’t toch allemôl wér net a.nders organisiert. Wél allemôl mit ’t zellefde doel: de Limburgers enne prachtige vastelaovend brenge! ’t Was daor én mój feestje, waorbïj Prinses Birgit en Meniekse op en gegève moment nog as da.nsmarietjes op de bühn stonte.
De Zitting, op 12 dizzember, was ôk wér en eneenschakeling van högtepu.nte. Wat enne mójjen aovend. ’t Wier laot, mar wïj hebbe o.ns gen mome.nt vervèè.ld. Nao de zitting kwam de Kerst, en toen was ’t alwér nïjjaor. Nïjjaorsduik ien de Nierst. Brrr., wie da verzonne hét..!
En nïj jaor is vör enne nïjje Prins. Da’s mar goed ok, mar da betèèkende wel dat nów e.cht hôs gedaon was. Op de Boerekoffietôffel vörafgaond en ’t Boerebal krege wïj de gelegenheid öm o.ns familie en ’t Bombakkes te bedanke vör en prachtig jaor. Da hebbe wïj op o.ns èège manier prebiere te doen. Daornao nog en par keer op de tôffel, vördat ’t dan e.cht afgelope was. Wíj hân en afscheidslied gemâkt waorien wïj prebierde uut te drukke wat vun mój jaor ’t vör o.ns gewést was. Helaas kôs de Prins nie goed wie.s ha.lde (kombinaasie van bier, verkèèldheid en emosie) mar gelukkig zong iedereen goe.d mit. ’t Lied nam hôs de volle 11 minute sprèèktied in beslag en al gáw daornao wiere wij as Boer Maarten en Boerin Birgit dör de ex-Hooghede naor de tap geleid. En daormit zat ’t d’r è.cht op. ’t Was vör o.ns zeas gezet en onvergèètelek jaor en wïj wille dan ôk alle Génnepse vastelaovesvierders ómmundig veul dank zegge. Dankzij óllie wie.ze manier van gek doe.n, ienzet en entoezjasme, hebbe wïj enne fantastisch mójje vastelaovend mit mögge make.
’t Hèt d’r gekröld, en ’t zal d’r blieve krölle!
Ex Prins Maarten d’n Urste . en Ex Prinses Birgit