Tijdens ’t Boerebal kwam ’t SLV, mit gevaor vör èège lèève dör de snèj, naor Gennep öm Ivo en Barend te onderscheiden mit de Orde van Verdienste vör hun jaore lange ienzet vör ’t Bombakkes.
As örste wier Ivo verrast toen zien naam wier ömgeroepe. Ivo het zich onder andere jaore iengezet vör de zitting as vörzitter van de commissie. Ivo het ôk duk ’n functie gehad ien ’t team van de Prins, duk waren Henriëtte en hïj twèdde adjudant en zörgde ze dat de dansmarietjes niks te kort kwaame. Mar ôk wilde hïj zich altied ienzette vör de vereniging en mit zien enthousiasme kreeg hïj vaak de neuzen dezelfde kant op.
Zelfs nòw Ivo gestopt is bïj ’t Bombakkes organiseert hïj nog vastelaovendactiviteite. Saame mit ’n gruupke minse hebbe ze de Liedjesaovend nïj lèève iengeblaoze: Genneps Plat.
Toen was ’t de beurt ân Barend, vör hem minder onverwacht, toen de SLV binne kwam zei hïj al: “Oh die kômme vör mien”. En zo bleek. Barend, de nestor van de clup, is nao 34 jaor (recoorhouder langste raodslid) gestopt bïj ’t Bombakkes. Ien Gennep mos iedereen afgeloope vastelaovend twee keer kieke toen ze hem zaage loope, want nao 34 jaor liep hïj niet ien smoking tijdens de vastelaovend.
Barend het ien zowat elke commissie gezeete en zich daor altied vör iengezet. Hïj is jaorelang vörzittter gewèst van de optochtcommisie. Dör zien jaorelange ervaring was hïj ôk ’n soort geweete van de clup, hïj wist veul van de historie van de clup. Hïj had altied ’n kritische blik en zelfs op zien èège ideeën stemde hïj tèège. Nao al die jaore hebbe Jeanette en Barend afscheid genoome van ’t Bombakkes.
Ivo en Barend, maar natuurlijk ook Henriëtte en Jeanette, bedankt vör alles wat gillie het gedaon vör ’t Bombakkes en vör de Gennepse vastelaovend!