't Bombakkes

Bizonder gröts kunne wïj me.lde dat vanmé.rge Bombakkes Officier Michiel Ponjee naames ziene Majesteit de Könning dör Burgemèèster de Könning benoemd is tot Lid ien de Orde van Oranje Nassau. 

Dit mójje li.ntje kreeg Michiel opgespe.ld vör zien groote verdienste vör de Génnepse gemeenschap. O.a. bïj Summmertime, Stichting Evenementen Gennep, de Kienderboerderij, Buurtvereniging de Loodsstraot hét hïj jaorelang veul vrïjwilligerswe.rk verricht.

Mar wïj eere hum, saame mit zien lieftaligge vrów Ria, vöral vanwèège zien uutzonderleke verdienste vör ’t Bombakkes, de Mé.rtzitting en de Génnepse Vastelaovend. 

Michiel en Ria, naames Prins Stef, Prinsés Dyantha en heel ’t Bombakkes van harte gefilliciteerd mit dees dik verdiende onderscheiding!

Gistere ontvinge wïj ’t droevige bericht dat Ex-Prins Pierre d’n Twédde, Prins van ’t Bombakkes ien 2007, van o.ns is hingegaon. Pierre hét wies ’t létst tégge zien sloopende ziekte gevochte mar uuteindelek de strijd toch op mótte gèève. 
Behalve dat Pierre Verhasselt enne enthousiaste, muziekaole en bevlooge Hoogheid was, was ie ôk meer as 11 jaor trówwe sponsor van ’t Bombakkes. Mit zien Verhasselt Mannenmode zörgde hïj d’r ieder jaor wér vör dat o.nze nïjje Prins wér piekfijn ien ’t nïj gestoake wier. Gelukkig hébbe wïj ‘m  daorvör eind 2017, bïj ’t sluute van de wi.nkel, nog op en passende manier kunne beda.nke.

Wïj haope dat Pierre nów eindelek zien ru.st gevo.nde hét en wi.nse zien familie heel veul sterkte bïj ’t verwe.rke van dit verlies.

Ömdét ’t hôs Halfva.ste is, is dit en mój mome.nt öm nog ’s mit veul plezier trug te kie.ke op Vastelaovend 2018, onder heerschappij van Prins Stef d’n Örste:

Wat hébbe we mit zien alle toch wér enne gewéldige vastelaovend belèèfd. ’t Eene högtepu.nt volgde op ’t a.ndere. Names Prins Stef en Prinsés Dyantha wille wïj dan ôk iedereen beda.nke die ân dit prachtige feest hét bïjgedrage. ’t Hét d’r gekrö.ld en ’t zal d’r a.ltied blie.ve krölle!!!

We zitte nów ien de fase van ’t naogeniete en gelukkig hébbe we daorbïj de foto’s nog. Mit da.nk ân ’t Plékplötje, Mireille en d’n Haon.

no images were found